Carriola.Redacción.01.06.26
O vindeiro venres 5 de xuño ás 20:00 horas, o Ateneo Santa Cecilia de Marín acollerá a charla “Herbas, orballo e lume: o significado das herbas de San Xoán”, unha actividade enmarcada na programación do Día Mundial do Medio Ambiente.
A sesión será impartida por José Souto, paisaxista técnico e director de proxectos, con máis de 20 anos de experiencia no deseño e desenvolvemento de espazos exteriores e cunha traxectoria recoñecida no ámbito do paisaxismo tanto en Galicia como a nivel nacional.
Durante a charla realizarase un percorrido que partirá dunha aproximación histórica e cultural para introducirse na identificación e coñecemento botánico das plantas, abordando o seu simbolismo, así como os seus usos tradicionais e medicinais.
A tradición das herbas de San Xoan
A proposta busca achegar ao público unha tradición profundamente arraigada en Galicia, poñendo en valor o coñecemento popular vinculado ás plantas e o seu papel na construción da identidade cultural.
O encontro, segundo indican desde o Ateneo Santa Cecilia “combina divulgación, cultura e natureza, conectando o saber tradicional cunha mirada contemporánea da paisaxe. Poñerase o foco nas plantas como protagonistas, non só desde o seu valor ornamental, senón como parte dun ritual ancestral asociado á limpeza do corpo e da mente durante a noite máxica de San Xoán e, se o tempo o permite, o sábado 6 realizarase unha saída ao campo para identificar e recoller algunhas das herbas tratadas na charla”.
O horario e o punto de encontro concretaranse o venres, xusto ao remate do faladoiro. Ambas actividades son de balde e de acceso libre ata completar aforo.
