Carriola. Redacción. 05.06.2026
O Ateneo Santa Cecilia de Marín informou da cancelación do taller infantil gratuíto de reciclaxe que estaba previsto para este sábado 6 de xuño con motivo da celebración do Día Mundial do Medio Ambiente. A entidade explicou que a actividade non poderá levarse a cabo ao non alcanzarse o número mínimo de inscricións necesario para a súa realización.
Desde o Ateneo lamentan as molestias que esta decisión poida ocasionar ás familias e aos participantes interesados, ao tempo que agradecen o interese mostrado pola iniciativa. O comunicado foi asinado polo presidente da entidade, Celso Méndez, quen trasladou as desculpas da organización pola suspensión da actividade.
