Carriola.Grupo Municipal do PSOE (R).09.08.23
julio@carriola.es
Os socialistas queremos que as nais e pais de Marín poidamos ter charlas especializadas sobre os principais problemas que afectan aos nosos fillos durante a sua infancia e xuventude. Problemas como o fracaso escolar, os transtornos alimenticios, as adicións ao xogo, as depresións... Para elo queremos impulsar unha escola de nais e pais cunha programación estable, amplia, participativa e accesible a través de internet.
A aparición das novas tecnoloxías, as redes sociais, as novas formas de acoso, os diferentes roles sociais, etc. provocan situacións familiares para as que moitas veces as nais e os pais non estamos suficientemente preparados nin formados para afrontalas.
Entender os problemas dos nosos nenos e mozos é o primeiro paso para que poidamos abordalos e poder exercer da mellor maneira posible a crianza e educación nun mundo que para eles non é sinxelo. Que as nais, os pais, os avós, os familiares… dispoñamos de ferramentas e un maior coñecemento sobre cómo afrontalos facilitará que poidamos ter fillos sans e felices, que é o obxectivo de todas as familias.
Por este motivo os socialistas de Marín queremos impulsar a creación dun ciclo estable de conferencias e charlas onde diferentes expertos e profesionais poidan explicarnos estas problemáticas relacionadas coa infancia e a adolescencia. Moitas son as temáticas que queremos que sexan abordadas, entre elas:
- Hiperactividade e déficit de atención.
- Transtornos do espectro autista (autismo, síndrome de Asperger, síndrome de Rett…)
- Transtornos alimenticios (anorexia, bulimia…).
- Adicións (videoxogos, teléfonos móbiles, apostas online, consumo de drogas, alcoholismo…).
- Sexualidade (acoso, malos tratos, pornografía, discriminación sexual…).
- Bulling e fracaso escolar.
- Transtornos depresivos.
- Os límites e a xestións das emocións dos máis pequenos.
- Importancia da vida saúdable (deporte, alimentación, descanso…)
Os socialistas non queremos que se impartan charlas esporádicas, ailladas e inconexas como sucede agora mesmo, se non que se aborde o problema dun xeito integral e decidido mediante a creación dun ciclo de charlas e conferencias estable, riguroso, permanente e participativo e na que tamén poñamos toda esa información para o acceso de calquera persoa a través dunha páxina web onde poder dispor de toda a documentación e videos.
