Carriola.Subdelegación do Goberno (R).29.06.24.
julio@carriola.es.
Abel Losada visita as obras da avenida de Ourense, en Marín, e subliña o exemplo do Goberno na colaboración con tódolos concellos destacando a gran calidade da transformación dun tramo de case 1,6 Km dende a entrada en Marín ata a praza de España.As máquinas retiraranse cara finais de ano e o ámbito da PO-11 será traspasado ao Concello
Alcaldesa y Subdelegado durante la visita a las obras
O subdelegado do Goberno en Pontevedra, Abel Losada, visitou onte as obras de humanización da PO-11 no tramo urbano de Marín, coincidente coa Avenida de Ourense. Acompañado pola alcaldesa, María Ramallo, e polo xefe provincial de Estradas, Pablo Domínguez, destacou que con esta actuación ponse de manifesto a vontade de colaboración do Goberno de España “que lle vai ceder este tramo urbano en magníficas condicións ao Concello, beneficiando a toda a veciñanza de Marín e aos milleiros de persoas usuarias desta vía pública”.
Abel Losada recalcou que o Goberno mostra en Marín a súa “vocación municipalista” e avanza: “seguiremos traballando man a man con todos os concellos particularmente no capítulo de investimentos, como entendemos que deberían facer tódalas administracións”. “Esta actuación é un bo exemplo do que debería ser a colaboración institucional”, explicou.
Orzamento
O orzamento da obra, que executa o Ministerio de Transportes con fondos europeos do Plan de Recuperación, Transformación e Resiliencia do Goberno de España, ascende a 1.119.358,61 €. e as obras comezaron en marzo e desenvólvense a un bo ritmo, coa previsión de que poidan estar rematadas a finais de ano. Está prevista a ralentización durante o verán para prexudicar o menos posible ao tráfico rodado.
Cooperación municipal
O subdelegado agradeceu a cooperación activa do Concello, “que colaborou activamente no deseño desta obra de humanización, que supón unha mellora moi importante en termos de seguridade e accesibilidade para os peóns nunha entrada fundamental ao centro urbano de Marín”. Abel Losada explicou que a intervención “permite gañar en racionalidade, pois tras esta obra todo o tramo urbano da PO-11, ata o remate na farola da praza de España, pasará a ser de titularidade municipal, respondendo así ao acordo plenario adoptado”.
Transformación do tramo
As obras abranguen o tramo de case 1,6 Km entre Cantoarea e a praza de España, polo que supoñen na práctica a transformación da arteria fundamental do centro urbano de Marín. O deseño baséase nunha gran ampliación do ancho das beirarrúas na beira interior, creando unha ampla superficie destinada aos peóns e solucionando problemas de accesibilidade existentes ata o de agora. As vivendas, a hostalería e o tecido comercial da zona xa comeza a beneficiarse deste novo espazo peonil tal e como puideron comprobar o subdelegado e a alcaldesa nun paseo pola zona. Esta importante ampliación foi posible ao suprimir o sobreancho na superficie asfaltada que había na beira contigua ao porto.
A glorieta, elemento diferencial
O outro elemento diferencial da obra é a construción dunha glorieta no cruce, regulado agora por semáforos, no punto quilométrico 5+050. Esta rotonda vai supor unha importante mellora na fluidez da circulación e tamén na seguridade viaria ao favorecer os xiros. Deste xeito eliminarase o actual semáforo. En canto ao aparcamento, mantense a disposición en batería no lado do porto e en liña na beira do interior.
Saneamento e augas
A actuación xa superou a fase máis complicada tralo remate da instalación das tubaxes dos servizos municipais de auga, saneamento e pluviais, así como os cruces transversais na calzada. Por último, tamén se procederá á renovación integral do firme e da sinalización, así como á colocación de novos farois e luminarias, así como á dotación de mobiliario urbano.
