Carriola.Redacción.08.04.22
A polémica decisión persoal do presidente do goberno Pedro Sánchez con respecto ao pobo saharaui é considerada desde o Bloque Nacionalieta Galego como “unha traizón ao pobo saharauí, xa que prégase aos intereses de Marrocos e vai en contra de todos os acordos adoptados até o momento polas institucións internacionais”.
Por eso, segundo indica nun comunicado a portavoz nacionalista no Pleno marinense, Lucía Santos, “Diante da decisión do goberno español de asumir a postura de Marrocos de non respectar o dereito de autodeterminación do pobo saharauí, o BNG mostra o total rexeitamento á mesma. Esta supón a asunción da posición e discurso da ditadura marroquí sobre o Sahara Occidental, aceptando o seu plan de autonomía, e que na práctica significa a anexión por Marrocos do territorio saharauí”.
Traizón ao pobo Saharaui
Considera a postura do goberno español como “unha traizón ao pobo saharauí, xa que prégase aos intereses de Marrocos e vai en contra de todos os acordos adoptados até o momento polas institucións internacionais, que unanimemente se teñen pronunciado a favor do dereito do pobo saharauí a exercer o seu dereito de autodeterminación, por medio dun referendo entre a súa poboación.”
Lexitimar as actitudes de Marrocos
Lucía Santos no texto da moción que preseta para ser tratada na próxima sesión plenaria, entende que “A postura do goberno español supón lexitimar a ocupación por parte de Marrocos, a represión, a violación dos dereitos humanos e o roubo das riquezas existentes en territorio saharauí. Ademais demostra que a política exterior do goberno español se alínea claramente cos posicionamentos dos EUA e Israel, dous estados coñecidos pola súa política imperialista de agresión a outros pobos, e apoio a réximes antidemocráticos, como é o caso da monarquía marroquí”.
Aumento da tensión latente
“Esta decisión - engade Santos Omil -aumenta a situación de tensión nunha rexión na que a provocación de Marrocos en novembro de 2020, levou ao reinicio do enfrontamento bélico entre os exércitos saharauí e marroquí e por todo isto o BNG traslada unha moción ao vindeiro pleno municipal para solicitar á corporación municipal o apoio ao pobo saharauí contra a ocupación militar e esixir do Goberno español a rectificación da decisión de asunción da posición e discurso da ditadura marroquí sobre o Sahara Occidental, e polo tanto defender o dereito do pobo saharauí a exercer o seu dereito de autodeterminación por medio dun referendo, tal como recoñecen todos os acordos adoptados até o momento polas institucións internacionais, a empezar pola ONU, que unanimemente se teñen pronunciado neste sentido”.
