Carriola.Redacción.28.06.22
Dese onte hai instalado un photocall no Palco da Música e outro en Briz co que o CIM anima a que a veciñanza mostre o seu apoio ao amor sen etiquetas, subindo unha foto co hashtag#oamorediverso. Ademais, crearase un espazo propio na Biblioteca, o “Espazo Violeta”, con lecturas que fomenten a igualdade.
Transcribimos unha nota de prensa remitida polo Concello co gallo da celebración hoxe do Día Internacional do Orgullo LGTB na cal manifestase:
O Concello de Marín, a través do CIM, quere dar visibilidade ás diferentes identidades, sensibilidades e singularidades das persoas co obxectivo de camiñar cara a unha sociedade libre e igualitaria. Co lema "O amor é diverso, libre e tolerante", como recoñecemento das diferencias, a diversidade e as maneiras de ser ou de actuar das persoas na convivencia social, o Concello programa as seguintes accións:
1.- Para conmemorar o 28 de xuño, Día internacional do Orgullo LGBT, data de carácter internacional declarada polas Nacións Unidas, colocaranse duas maquetas en cartón pedra, a modo de photocall para Instagram, no Palco da Música e na Finca de Briz. As persoas que queiran apoiar a campaña poden sacar unha foto co móbil para colgar no seu Instagram co hashtag #oamorediverso.
2.- A creación dun espazo propio na Biblioteca Municipal Vidal Pazos denominado "Espazo Violeta: Lecturas para a Igualdade" no que se pretenden impulsar actuacións de promoción da igualdade e a eliminación da discriminación entre mulleres e homes e da violencia de xénero, dos estereotipos sexistas, dar pulo ásnovas masculinidades e recoñecer textos nos que a diversidade se presente de maneira natural.
Estas lecturas coeducativas estarán clasificadas en tres grupos: primeiras lecturas, lecturas autónomas e lecturas expertas. Máis de 50 libros poderán ser lidos baixo o préstamo habitual da Biblioteca, cunha mirada crítica dende o punto de vista do xénero que permita ver as desigualdades e discriminacións entre mulleres e homes e así conseguir un mundo máis xusto, libre e igualitario.
Esta acción está financiada con Fondos do Pacto do Estado en materia de Violencia de Xénero outorgados ao Concello de Marín no ano 2021.
