O Ateneo Santa Cecilia convoca coa colaboración do Concello de Marín a LXVIII (58º) edición do “Concurso de Maios e Embarcacións dirixido a tódolos centros escolares e Asociacións de Marín e a bisbarra.
Carriola. Redacción.
Como cada ano desde 1953, O Ateneo convoca este tradicional Concurso a celebrar o dia 1º de Maio. Nesta ocasión e pola situación actual de “pandemia” ,as restricións de mobilidade e xuntanza de persoas, introdúcense unha serie de modificacións co obxectivo de que esta festa se poida levar a cabo con todo o seu esplendor e solemnidade. Dándolle a oportunidade de participación a todos/as que o desexen desde os centros escolares e asociacións.
O Ateneo propón que os diversos grupos de participantes preparen os seus maios, embarcacións e coplas e leven a cabo a súa elaboración nos colexios e asociacións nos dias previos ao 1º de maio de 2021 para que todos os/as alumnos/as e participantes tomen parte, manteñan e desfruten de esta festa tradicional. A idea é que, tanto os maios como as embarcacións se trasladen a Alameda de Marín o propio dia 1º de maio antes das 12.00 h. para que toda a xente poida admirar os traballos realizados (Cada Maio e Barco inscrito terá un lugar asignado no que permanecerá ate o final do dia).
Ademáis, todos os grupos participantes que o desexen, poden realizar un maio (miniatura) que non exceda de un metro de altura, coroa incluída co obxecto de participar nunha exposición no Museo Municipal Manuel Torres, onde quedarían expostos durante 8 días.
Bases do concurso
1.- Os MAIOS terán forma cónica e os armazóns poderán estar feitos con calquera material. Na decoración exterior dos MAIOS só se utilizarán elementos vexetais e naturais.
2.- As EMBARCACIÓNS só serán de construción artesanal.
3.- A COROA deberá respectar as formas tradicionais dos maios de Marín e estará recuberta con material vexetal. Non se permitirán engadidos de figuras ou outros símbolos non tradicionais.
4.- Os grupos que desexen tomar parte neste concurso, teñen que face-la súa inscrición antes das 20:00 horas do dia 27 de abril. Para elo, deberán facelo no correo electrónico do Ateneo, ateneosantacecilia@gmail.com. Á dita inscrición deberanse axuntarse unha copia da letra coa que participen no concurso.
5.- A valoración dos grupos participantes, farase mediante un xurado, formado por dous representantes do Ateneo e un do Concello que valorarán de 1 a 10 puntos, a cada participante, en cada un dos apartados do concurso, puntuación que se fará pública ao remate do concurso. O Xurado contará cun secretario do Ateneo e o seu fallo non poderá ser recorrido.
6.- Os apartados do concurso serán
Para Maios;
- A) no seu conxunto (Maio e coroa) e
- B) Letra,
Para EMBARCACIÓNS:
A.- Construción
B.- Letra.
(Pola situación de pandemia e medidas de seguridade eliminase o apartado de interpretación )
En cada apartado haberá
- Un primeiro premio de 120 Euros,
- Un segundo de 80 Euros e
- Un terceiro de 50 Euros,
podendo quedar deserto algún deles si o xurado así o considerara.
7.- Tódolos grupos recibirán unha axuda de 80 Euros polo feito de participar.
8.- A letra da coplas deberá ser en galego e de libre composición.
9.- Usaranse as melodías tradicionais tanto no caso dos Maios como das Embarcacións, e o xurado terá en conta, se se dera o caso, a recuperación dalgunha melodía tradicional.
10.- Os grupos participantes terán, obrigatoriamente, que aceptar a visita do xurado o dia 30 de abril para a valorar os traballos, así como o compromiso de trasladar os traballos a Alameda Rosalia de Castro o dia 1º de maio entre as 12.00 h e as 20.00 da tarde.
11.- A participación no concurso obriga a aceptar as bases na súa totalidade.
